I’w ryddhau ar unwaith
Mae Anabledd Cymru yn cefnogi pobl anabl ledled y wlad sydd eisiau dylanwadu ar ddyfodol democratiaeth yng Nghymru drwy lansio’r Pecyn Cymorth Mynediad at Wleidyddiaeth newydd a cham nesaf Cronfa Mynediad i Swyddi Etholedig Cymru mewn digwyddiad ar-lein ddydd Iau 24 Medi.
Mae pobl anabl yn dal i gael eu tangynrychioli yn y byd gwleidyddol. Mae’r pecyn cymorth a’r gronfa hon yn gweithio ochr yn ochr i gael gwared ar rai o’r rhwystrau y mae ymgeiswyr anabl yn eu hwynebu wrth geisio cael mynediad cyfartal at gyfranogiad democrataidd.
Cafodd y Pecyn Cymorth hwn ei gyd-gynhyrchu ar y cyd ag aelodau o’r Rhwydwaith Mynediad at Wleidyddiaeth ar Lawr Gwlad a’i lywio gan eu profiad personol o gymryd rhan mewn gwleidyddiaeth. Ei nod yw galluogi pobl anabl i ddygymod â byd cymhleth gwleidyddiaeth; boed hynny drwy sefyll am swydd yn cynrychioli plaid wleidyddol, fel ymgeisydd annibynnol neu drwy ymgyrchu i wella hawliau pobl anabl.
Bydd y ddogfen gam wrth gam yn rhoi’r cyngor ymarferol sydd ei angen ar bobl anabl ac yn eu helpu i fagu hyder wrth ddilyn eu huchelgais wleidyddol. Mae’r ddogfen yn tynnu sylw ac yn mynd i’r afael â rhai camsyniadau ynghylch sefyll am swydd wleidyddol, a’r nod yw hwyluso taith pob darpar wleidydd.
Mae’r Gronfa Mynediad i Swyddi Etholedig Cymru yn rhoi cymorth arionnol i ymgeiswyr anabl sydd â chostau sy’n gysylltiedig ag amhariad. Mae hyn yn cynnwys cyllid ar gyfer dehonglwyr Iaith Arwyddion Prydain, cynorthwywyr personol, trafnidiaeth hygyrch a thechnoleg gynorthwyol.
Mae’r Gronfa ar gael yn ystod y cyfnod sy’n arwain at yr etholiadau Llywodraeth Leol ym mis Mai 2027, o’r adeg y caiff unigolyn ei gyhoeddi’n ffurfiol fel ymgeisydd hyd nes y mae canlyniadau’r etholiad yn cael eu cyhoeddi. Fodd bynnag, anogir ymgeiswyr i wneud cais yn gynharach er mwyn gallu rhoi cymeradwyaeth dros dro ac asesu anghenion cymorth ymlaen llaw. Mae cymorth ar gael i ddarpar ymgeiswyr ac ymgeiswyr sydd wedi’u cadarnhau sy’n sefyll dros blaid wleidyddol neu fel ymgeiswyr annibynnol mewn etholiadau i’r prif gynghorau a chynghorau cymunedol.
Mae’r ddau brosiect wedi cael eu hariannu gan Lywodraeth Cymru ac maent yn amhleidiol.
Dywedodd Siân Gwenllian, Y Gweinidog Cabinet dros Lywodraeth Leol, Tai a Chynllunio: “Dylai pob person anabl sydd eisiau sefyll am swydd etholedig yng Nghymru gael yr hyder a’r gefnogaeth ymarferol i wneud hynny. Bydd lansio’r Pecyn Mynediad at Wleidyddiaeth, ochr yn ochr â cham nesaf Cronfa Mynediad i Swyddi Etholedig Cymru, yn helpu i chwalu’r rhwystrau sy’n llwyddo i atal pobl yn rhy aml o lawer.
“Nid mater o degwch yn unig yw hyn; mae’n ymwneud â chryfhau ein democratiaeth. Mae cynghorau a chymunedau’n elwa pan fo’r bobl sy’n eu cynrychioli yn adlewyrchu holl amrywiaeth Cymru. Byddwn yn eich annog i edrych ar ba gymorth sydd ar gael a dechrau’r sgwrs.”
Dywedodd Rhian Davies, Prif Weithredwr Anabledd Cymru: “Mae’n hanfodol i ddemocratiaeth bod mwy o bobl anabl yn cael eu cynrychioli mewn bywyd cyhoeddus a gwleidyddol, gan ddefnyddio eu profiad bywyd i ddylanwadu ar benderfyniadau a sicrhau bod polisïau ac adnoddau’n diwallu anghenion gwirioneddol cymunedau. Drwy lansio’r Pecyn Cymorth a cham nesaf y Gronfa Mynediad i Swyddi Etholedig, mae Anabledd Cymru yn falch o fod ar y blaen wrth sicrhau mwy o fynediad at ymgysylltiad gwleidyddol a chefnogi datblygiad pobl anabl fel arweinwyr y dyfodol.”
Dylai pobl anabl sydd â diddordeb fynd i wefan Anabledd Cymru i gael rhagor o wybodaeth.
Nodiadau i olygyddion
- Anabledd Cymru yw corff aelodaeth cenedlaethol Sefydliadau Pobl Anabl yng Nghymru sy’n ymdrechu i sicrhau hawliau i bobl anabl yng Nghymru.
- I gael rhagor o wybodaeth am y Pecyn Cymorth Mynediad at Wleidyddiaeth, ewch i Mynediad at Wleidyddiaeth neu cysylltwch â kat.watkins@disabilitywales.org.
- I gael gwybodaeth am Gronfa Mynediad i Swyddi Etholedig Cymru, ewch i Cronfa Mynediad i Swyddi Etholedig Cymru neu cysylltwch â’r electedofficefund@disabilitywales.org.
